Biblia Etíope · Biblia Etíope en Ge'ez
Judas
መልእክተ፡ይሁዳ፡እኁሁ፡ለያዕቆብ።1እምይሁዳ፡ገብረ፡ኢየሱስ፡ክርስቶስ፡እኁሁ፡ለያዕቆብ፡ለእለ፡ያፈቅርዎ፡ለእግዚአብሔር፡አብ፡ስሙያን፡ወጽዉዓን፡በኢየሱስ፡ክርስቶስ።
2ሰላም፡ለክሙ፡ወተፋቅሮ፡ወሣህል፡ይብዛኅ፡ማእከሌክሙ።
3አኀዊነ፡በኵሉ፡አስተፋጠንኩ፡ከመ፡እጽሐፍ፡ለክሙ፡በእንተ፡ሕይወተ፡ኵልነ፡እስመ፡ጥቀ፡እጽሕፍ፡ለክሙ፡ጽሁቀ፡ወአስተበቍዐክሙ፡ከመ፡ትትቀነይዋ፡ለእንተ፡ተውህበት፡ለቅዱሳን፡ሃይማኖት።
4እስመ፡ተደመሩ፡ብክሙ፡ሰብእ፡ረሲዓን፡እለ፡ጽሑፋን፡ቀዲሙ፡ለዝንቱ፡ደይን፡እለ፡ያፈልስዋ፡ለጸጋ፡እግዚአብሔር፡ውስተ፡ዝሙቶሙ፡ወይክሕድዎ፡ለዘውእቱ፡ባሕቲቱ፡ንጉሥ፡እግዚእነ፡ኢየሱስ፡ክርስቶስ። በእንተ፡አዘክሮተ፡ቀዳማይ።
5ወፈቀድኩሰ፡አዘክርክሙ፡ኵሎ፡ወታአምሩ፡ምዕረሰ፡ከመ፡ኢየሱስ፡አድኀነ፡ሕዝቦ፡እምድረ፡ግብጽ፡ወበዳግምሰ፡ለእለ፡ኢአምኑ፡አጥፍኦሙ።
6ወለመላእክቲሁኒ፡እለ፡ኢዐቀቡ፡ፍጥረቶሙ፡ወኀደግዋ፡ለሥርዓቶሙ፡ውስተ፡ደይን፡አንበሮሙ፡ወተአሥሩ፡ለዕለት፡ዐባይ፡ለዘለሊሆሙ፡አቅነዩ፡ርእሶሙ።
7ወከማሁ፡ሰዶምኒ፡ወገሞራ፡ወአህጉርኒ፡እለ፡ምስሌሆን፡እለ፡በአርአያሆን፡ዘመዋ፡ወተለዋሆን፡በፍትወተ፡ዝሙት፡ሤሞሙ፡አርአያ፡ደይን፡ዘእሳት፡ዘለዓለመ፡ዓለም፡ወተመጠዋ፡ኵነኔሆን።
8ወከማሁ፡እሉኒ፡እለ፡በሕልሞሙ፡ያጌምኑ፡ሥጋሆሙ፡ወይክሕድዎ፡ለእግዚኦሙ፡ወይፀርፉ፡ላዕለ፡ስብሐቲሁ።
9ወሚካኤልኒ፡ሊቀ፡መላእክት፡አመ፡ይትበሀሎ፡ለሰይጣን፡በእንተ፡ሥጋሁ፡ለሙሴ፡ኢተኀበለ፡ቃለ፡ፅርፈት፡ይንብብ፡አላ፡ይቤሎ፡ይሒሰከ፡እግዚአብሔር።
10ወእሉሰ፡እላ፡ይፀርፉ፡እሙንቱ፡ይኤብሱ፡በዘኢያኦምሩ፡ወሕሊናተሰ፡ዘሥጋ፡ያአምሩ፡ከመ፡እንስሳ፡ወባቲ፡ይሤረዉ።
11አሌ፡ሎሙ፡እስመ፡በፍኖተ፡ቃየን፡ሖሩ፡ወበዐስበ፡ጌጋዩ፡ለበለዓም፡ውዕዩ፡ወበካሕዱ፡ለቆሬ፡ተሐጕሉ።
12እሉ፡እሙንቱ፡እለ፡በፍቅር፡አፍቀሩክሙ፡ከመ፡ያስሕቱክሙ፡ተባዕያን፡ለኃጢአቶሙ፡ወየሐውሩ፡ በፍትወቶሙ፡ወዘእንበለ፡ፍርሀት፡ይሬዕዩ፡ርእሶሙ።ከመ፡ደመና፡እሙንቱ፡እንተ፡አልባቲ፡ዝናም፡እንተ፡ትትሀወክ፡እምነፋስ፡ከመ፡ዕፀዋትኒ፡ይቡሳት፡እለ፡አልቦን፡ፍሬ፡እለ፡ካዕበ፡ሞታ፡ወተሠረዋ።
13ሞገዳተ፡ባሕር፡እሙንቱ፡እቡዳት፡እለ፡ያፈልሕዋ፡ለኀሳሮሙ።ወከመ፡ከዋክብት፡ጽልሙታን፡እለ፡ ለፍጻሜ፡ጽልመቶሙ፡ይጸንሖሙ፡ለዓለመ፡ዓለም።
14በከመ፡ተነበየ፡ሄኖክ፡በእንቲአሆሙ፡ዘውእቱ፡ሳብዕ፡እምአዳም።ወይቤ፡ናሁ፡ይመጽእ፡እግዚአብሔር፡በአእላፊሁ፡ቅዱሳን።
15ከመ፡ይግበር፡ኵነኔ፡ወይፈድዮ፡ለኵሉ፡ወይዛለፎሙ፡ለኵሎሙ፡ኃጥኣነ፡በእንተ፡ኵሉ፡ግብረ፡ ኃጣውኢሆሙ፡ዘአበሱ፡ወበእንተ፡ኵሉ፡ዘነበቡ፡ላዕሌሁ፡ዘኢይከውን፡ቃለ፡ኃጥኣን፡ወጽልሕዋን።
16እሉ፡እሙንቱ፡እለ፡ያንጐረጕሩ፡እስመ፡ቅቡጻን፡ተስፋሆሙ፡እለ፡የሐውሩ፡በፍትወተ፡ልቦሙ፡ወአፉሆሙኒ፡ይነብብ፡ትዕቢተ፡ወያስተብዕሉ፡ወያደልዉ፡ለገጽ፡ወዝኵሉ፡ዘይገብሩ፡ከመ፡ይርብሖሙ።
17ወአንትሙሰ፡አኀዊነ፡ተዘከሩ፡ቃለ፡ዘነገሩክሙ፡ቀዲሙ፡ሐዋርያቲሁ፡ለእግዚእነ፡ኢየሱስ፡ክርስቶስ።
28ዘይቤሉክሙ፡ከመ፡በደኃሪ፡መዋዕል፡ይመጽኡ፡መስሕታን፡እለ፡ይሜህሩ፡በፍትወተ፡ልቦሙ፡ወያስሕቱ፡ በኃጣውኢሆሙ።
19እሉ፡እሙንቱ፡እለ፡ይስሕቡ፡በጌጋዮሙ፡ወያስሕቱ፡በፍትወተ፡ነፍሶሙ፡ወመንፈስ፡ቅዱስ፡አልቦሙ።
20ወአንትሙሰ፡አኀዊነ፡ሕንጹ፡ርእሰክሙ፡በሃይማኖትክሙ፡ቅድስት፡ወበመንፈስ፡ቅዱስ፡ጸልዩ።
21ወበፍቅሩ፡ለእግዚአብሔር፡ተዓቀቡ፡ወተሰፈውዋ፡ለምሕረቱ፡ለእግዚእነ፡ኢየሱስ፡ክርስቶስ፡እንተ፡ሕይወት፡ዘለዓለመ፡ዓለም።
22እስመቦ፡ለዘትዘልፍዎ፡በእንተ፡ኃጢአቱ፡ወለዘትምሕርዎ፡
23ወቦ፡ለዘታድኅንዎ፡እምውስተ፡እሳት፡ወትባልሕዎ፡ወቦ፡ዘይድኅን፡ፈሪሆ፡ወነሲሖ፡ወቦ፡እለ፡ጸሊኦሙ፡ዘቀዲሙ፡ጌጋዮሙ፡ዐራዘ፡ጥልቀተ፡ዝሙቶሙ።
24ወይክል፡እግዚአብሔር፡መድኀኒነ፡ዐቂቦተክሙ፡ዘእንበለ፡ጌጋይ፡ወአቅሞተክሙ፡ቅድመ፡ስብሐቲሁ፡ንጹሓኒክሙ፡በትፍሥሕት። 25